శ్రీసిటీలో ఘోర ప్రమాదం. బాధిత కుటుంబాలకు ప్రభుత్వం అండగా ఉంటుంది: కలెక్టర్, ఎస్పీ.

తడ(శ్రీసిటీ), అక్టోబర్ 3, మహి న్యూస్: తిరుపతి జిల్లా, తడ శ్రీసిటీ పారిశ్రామికవాడలో జరిగిన బాయిలర్ పేలుడు ఘటన శనివారం తీవ్ర విషాదాన్ని నింపింది. ప్రమాదం సమాచారం అందిన వెంటనే తిరుపతి జిల్లా కలెక్టర్ డాక్టర్ ఎస్. వెంకటేశ్వర్, జిల్లా ఎస్పీ ఎల్. సుబ్బారాయుడు హుటాహుటిన సంఘటనా స్థలానికి చేరుకుని పరిస్థితిని సమీక్షించారు. ప్రమాదానికి సంబంధించిన వివరాలను అడిగి తెలుసుకున్నారు. ఘటన స్థలాన్ని పరిశీలించి సహాయక చర్యలను పర్యవేక్షించారు. ప్రమాదంలో మృతి చెందిన, గాయపడిన కార్మికుల కుటుంబాలకు అండగా ఉంటామని హామీ ఇచ్చారు. అనంతరం బాధిత కుటుంబాలను పరామర్శించి వారికి ధైర్యం చెప్పారు. ఈ విషాద సమయంలో ప్రభుత్వం బాధిత కుటుంబాలకు అన్ని విధాలా ఆదుకుంటుందని అన్నారు. అవసరమైన సహాయ చర్యలు చేపడతామని తెలిపారు. గాయపడిన వారికి మెరుగైన వైద్యం అందేలా చర్యలు తీసుకోవాలని, ప్రమాదానికి గల కారణాలపై సమగ్రంగా దర్యాప్తు చేపట్టాలని సూచించారు. పరిశ్రమల్లో భద్రతా ప్రమాణాల అమలుపై కూడా అధికారులు ప్రత్యేక దృష్టి సారించాలని ఆదేశించారు. బాధితులకు న్యాయం జరిగేలా ప్రభుత్వం అన్ని చర్యలు తీసుకుంటుందని కలెక్టర్, ఎస్పీ స్పష్టం చేశారు. ఈ ఘటనతో శ్రీసిటీ పారిశ్రామికవాడలో విషాద ఛాయలు అలుముకున్నాయి.